Katika kuendelea kuimarisha huduma zake na kuendana na mahitaji ya uchumi wa kidijitali, Shirika la Posta Tanzania lilizindua huduma ya SWIFPACK, jukwaa la kisasa linalorahisisha usafirishaji wa vifurushi, mizigo na abiria kwa kutumia teknolojia ya kidijitali.

Huduma hii imeleta suluhisho la haraka, salama na rahisi kwa wananchi na wafanyabiashara wanaohitaji kusafirisha bidhaa au kupata huduma za usafiri kwa urahisi zaidi. Kupitia programu ya SWIFPACK, wateja wanaweza kuomba huduma, kufuatilia safari za mizigo yao na kupata taarifa kwa wakati halisi, jambo linaloongeza uwazi na ufanisi katika utoaji wa huduma.

Uzinduzi wa SWIFPACK ni sehemu ya mkakati wa Shirika la Posta Tanzania wa kubadilisha na kuboresha huduma zake kwa kutumia teknolojia za kisasa ili kukidhi matarajio ya wateja katika mazingira ya sasa ya kidijitali. Huduma hii pia imeongeza fursa za kiuchumi kwa wadau mbalimbali wanaoshiriki katika mnyororo wa usafirishaji na uchukuzi nchini.

Kupitia SWIFPACK, Shirika la Posta Tanzania limeendelea kuthibitisha dhamira yake ya kuwa taasisi bunifu inayotoa huduma zinazorahisisha maisha ya wananchi na kuchangia maendeleo ya uchumi wa kidijitali nchini.

Imeandaliwa na:
Kitengo Cha Mawasiliano,
Shirika la Posta Tanzania